Entertainment

Poetry with Joan Andrea Hutchinson: TODAY A TEACHERS’ DAY

By Joan Andrea Hutchinson

Today wi nah go gi yuh nuh trouble
Gwine do every ting yuh say
Wi a go keep quiet an behave wiself
For today a Teachers’ Day

A long time wi wen a wait fi dis day come
Wi keep meetin an wi plan
Suppose yuh see how wi wen a practise
Yuh wouldn undastan

Today nobady nah go sting nobady wid lastic
Pull up nobady hair
An wi a go talk so sweet an saaf
Yuh might nuh able hear

All shirt inna pants, every ribbon tie
Everybady shoes shine
An fi di fus time since dis year
Wi a go form a line

Teacher, mi really haffi wonda sometime
How yuh manage all a wi
All kine a hanwritin, nuff bad habit
Diffran personality

Sometime it look like wi nah learn
But wi jus waan yuh fi know
Dat is not sake a yuh kyan not teach
But becaw a slow wi slow

Wi know wi come een like crosses
Out a-order an rude
Mout ever set pan spring fi back answer
Or eat chring gum an food

Yuh say wi fi kine to wi one anadda
An yuh bex entime wi fight
For yuh tired fi haffi tell wi say
Two wrong doan meck a right

Yuh try teach wi manners an behaviour
How not to be so ruff
An fi conduct wiself wid courtesy
But teacher, wi head tuff

When yuh start breed hard an bite yuh lip
Git up an start walk rung
Wi know say yuh jus a try hinda yuhself
From dis tump wi dung

Ef a mi, mi kill di whole a wi wid beaten long time
Mi nuh know how yuh dweet
For mi would a haffi lef teachin an go look
One nex wuck out a street

So teacher aldoah wi nuh have nuh big money
Fi buy nuh big present
Fi di one day wi dah go try fi meck
Yuh happy an content

For yuh know say siddung still a nuh fi wi style
Or fi listen an obey
An wi nuh even sure wi kyan keep it up
Fi di whole a day

An when yuh go a heaven a gwine tell God
Fi gi yuh a special prize
Fi nuh mad sake a dis yah mad house class
An nuh deaf inna di noise

So today wi a go wuck hard an siddung quiet
Do everyting yuh say
Ef it kill wi, wi a go behave wiself
Just fi Teachers’ Day


Joan Andrea Hutchinson

Related Articles

Back to top button